Vazhdohet paraburgimi për punonjësen e OSBE-së në Kosovë, e akuzuar për spiunazh në favor të Serbisë

Punonjëses së misionit të OSBE-së në Kosovë, Jelena Gjukanoviq, e akuzuar për spiunazh në favor të Serbisë, i është vazhduar masa e paraburgimit edhe për dy muaj.

“Referuar kërkesës tuaj për informata, ju njoftojmë se pas propozimit të Prokurorisë Speciale të Republikës së Kosovës për vazhdimin e masës së paraburgimit në çështjen penale ndaj të pandehures J.Gj., gjyqtari i kësaj çështje penale pas shqyrtimit të kërkesës, me datë 19.09.2025 përmes Aktvendimit ka aprovuar kërkesën e PSRK-së, ashtu që të njëjtës iu është vazhduar masa e paraburgimit në kohëzgjatje prej 2 (dy) muaj, e cila masë do të llogaritet deri me datë 18.11.2025”, thuhet në përgjigjen e Gjykatës për Arbresh.info.

Gjatë shqyrtimit fillestar, avokati mbrojtës ka kërkuar që paraburgimi të zëvendësohet me arrest shtëpiak, kërkesë që është kundërshtuar nga prokurori i çështjes.

Në seancën fillestare, e pandehura Gjukanoviq është deklaruar e pafajshme./Arbresh.info